Arbaco:(SIC)-Xukuumadda Ankara ayaa sheegtay inay ka furayso Soomaaliya muddo bil gudaheed ah dugsi sare oo maadooyinkiisa ay ka mid noqon doonto luuqadda Turkiga, sidoo kalena lagu dhigan doono maadooyinka kala duwan ee cilmiga.

Dugsigan ayaa waxaa dhigan doonta 120-arday iyadoo sheegtay inay iyagu bixin doonaan buugaagta ay wax ku dhigayaan iyo kuwa kale ee ay wax ka baranayaan, isla markaana aysan jirin wax lacag ah oo laga qaadayo ardayda. Madaxa haya’dda Nil, Bilal Celik ayaa u sheegay warbaahinta Turkiga Arbacada maanta ah inuu socdo qorshaha diyaarinta dhismaha iskuulka iyo sidoo kale qorshe lagu xulanayo ardayda dhiganaysa, isagoo xusay inay hayaan 1,000 codsi oo lagu dalbanayo waxbarashada iskuulka.

“Qorshaheennu waa inaan wax barno 120 arday oo keliya,” ayuu yiri Celik, isagoo sheegay in ardaydaas ay qaadan doonaan maadooyin ay ka mid yihiin: fiisigiska, xisaabta, kimisteriga iyo cilmiga kambiyuutarka, dhammaan maadooyinkanna ay ku bixi doonaan luuqadda Ingiriiska. Sidoo kale, wuxuu sheegay in cilmiyada dhaqanka iyo taariikhda ay ku bixi doonaan luuqadda Soomaaliga, halka cilmiyada ku saleysan diinta ay Carabi ku bixi doonaan. Wuxuuna intaas ku daray in iskuulka lagu baranayo luuqadda Turkiga iyadoo la qaadan doono toddobaadkii 11 saacadood. Mr. Celik wuxuu sheegay in sagaal macallin oo Turkiga u dhashay ay ka mid noqon doonaan macallimiinta wax ka dhigaya iskuulka ay ka furayaan Soomaaliya, inkastoo uusan sheegin magaalada ay iskuulka ka furayaan.

Dowladda Turkiga ayaa waxay kawadaa Soomaaliya olole lagu caawinayo dadka Soomaaliyeed. Ra’iisul wasaaraha Turkiga Racep Tayyip Erdogan ayaa booqasho taariikhi ah ku tagay Muqdisho bishii Ogoosto ee sannadkan, isagoo booqday dhowr xero oo ay ku jiraan dad barakacyaal ah.

Somaliinfo kala soco warar dhex dhexaad ah had iyo jeer