Garowe:(SIC)-Shirkii wadatashiga dhinacyada Soomaalida ee ka socday magaalada Garoowe ee Puntland ayaa lasoo gabgabeeyay goor-dhow, iyadoo madaxdii shirkaas ka qaybgalay ay isku raaceen in nidaamka 4.5-ka lagu soo xulo xildhibaanada baarlamaanka soo socda.

Qodobbada ugu muhiimsan ee ay dhinacyadu ku heshiiyeen ayaa waxaa ka mid ah in xubnaha baarlamaanka cusub ay noqdaan 225-xildhibaan, waxaana xafladda laga sheegay in baarlamaanka lagu saleynayo nidaamka awood-qaybsiga beeleed uu shaqeynayo muddo afar sano ah, kaddibna lasoo dooranayo mudanayaal cusub oo ku dhisan habka deegaanka.

Gabagabadii xafladda waxaa ka hadlay madaxweynaha Soomaaliya, Sheekh Shariif Sheekh Axmed iyo madaxweynaha Puntland, C/raxmaan Sheekh Maxamed Faroole oo labaduba sheegay in shirku uu guul ku dhammaaday.

Madaxweynaha Puntand, Dr. C/raxmaan Faroole oo hadal jeediyay ayaa sheegay in isagu uusan ku qanacsanayn nidaamka 4.5-ka tan iyo markii la keenay haddana uusan ogoleyn balse markii la tanaasuli waayay uu isagu go’aansaday inuu tanaasulo.

Maamulka Puntland ayaa waxay soo jeediyeen in lagu soo xulo Sidoo kale, wuxuu sheegay in cadaadisyo badan la saaray, taasna ay keentay inuu ogolaado nidaamkan si muranka uu meesha uga baxo loona soo gabgabeeyo shirka oo ay ahayd in lasoo gabgabeeyo shalay oo Jimco ahayd.

Madaxweynaha Soomaaliya, Sheekh Shariif oo isaguna xaflada gabgabada ah ka hadlay ayaa sheegay in shirka uu ku dhammaaday guul, waxyaabihii la filayaynaay kasoo baxeen lana gudo-galayo fulintiisa. Sidoo kale Sheekh Shariif wuxuu mahad u celiyay shacabka Puntland.

Sheekh Shariif kama uusan hadlin muranka siyaasadeed ee hareeyay shirka, walow uu mararka qaarkood xusayay in la isku daahay taasna xal laga gaaray, iyadoo lasoo gaabiyay khudbadihii la filyay in laga jeediyo shirka.

Madaxdii shirka ka qaybgalay ayaa isla galabta ka dhoofay Garoowe, iyadoo dib ugu laabtay halkii ay ka yimaadeen, waxaana shirkan uu daba socday shir horay loogu qabtay Muqdisho, kaasoo lagu gaaray heshiiskii khariidadda nabadda.

Somaliinfo kala soco warar dhex dhexaad ah had iyo jeer