Muqdisho:(SIC)-Madaxweynaha Soomaaliya, Shariif Sheekh Axmed ayaa sheegay in dowladda KMG ah ay ku jirto magacaabidda guddi wadahadallo la fura Somaliland, isagoo soo dhaweeyay guddigii uu magacaabay madaxweynaha Somaliland Axmed Siilaanyo.

Sheekh Shariif wuxuu sheegay in markii ay guddiga magacaabaan ay billaaban doonaan wadahadallada dhexmaraya Somaliland iyo DKMG ah, isagoo xusay inay rajeynayaan in wadahadalladan ay meesha ka saari karaan madmadowga jira.

“In 21-sano kaddib lagu guuleysto in dadka Soomaaliyeed wadahadlaan anigu waxaan aamisanahay inay tahay guul u soo hoyatay Soomaaliya. Dadka Soomaaliyeed meel walba oo ay joogaanna dareen nabadeed ayay xambaarsan yihiin,” ayuu yiri Sheekh Shariif.

Madaxweynuhu wuxuu sheegay in heshiisku uu ku yimaado in la wadahadalo, isagoo intaas ku daray inay ka go’an tahay ka dowlad ahaan in la xalliyo tabashada jirta, isagoo sheegay in tabahshadu ay ka jiri karto reer koofurka dhexdiisa, ama reer waqooyiga dhexdiisa ama labada dhinac ay ka jiri karto.

Todobaadkan billowgiisii ayay ahayd markii madaxweynaha Somaliland, Axmed Siilaanyo uu magacaabay guddi heer wasiir ah oo ka kooban shan xubnood, kuwaasoo furi doona wadahadallo ay yeeshaan Somaliland iyo DKMG ah ee Soomaaliya.

Dhanka kale, madaxweynaha Soomaaliya wuxuu ka hadlay howlgallada ka socda gobollada Koonfureed iyo kuwa dhexe ee Soomaaliya, isagoo sheegay in deegaanno dhowr laga saaray Al-shabaab kuwa dhimanna uu rajeynayo in sida ugu dhaqsiyaha badan looga saaro.

“Ciidamada AMISOM iyo kuwa dalalka dariska waxaan uga mahadcelinaynaa dadaalka ay ku bixinayaan in Soomaaliya ay ka xorowdo Al-Qaacida, waana inaan garab-siinno,” ayuu yiri Sheekh Shariif.

Ugu dambeyn, madaxweynuhu wuxuu tacsi u diray dadkii ku dhintay qaraxii shalay ka dhacay Baydhabo, kaasoo ay ku dhinteen 12-qof oo shacab ah, tiro ka badan 30-qof oo kalena ay ku dhaawacmeen.

Somaliinfo kala soco warar dhex dhexaad ah had iyo jeer