Aragti:(SIC)-Shacab ama mujtamac wuxuu ka toosaa saddex unug ama qeyb-bood kuwaasoo kala ah-

1. Madaxda ummadda hoggaamisa oo si wanaagsan iyo cadaalad u meelmarisa hawlo maalmeedka bulshada iyagoo mideysan-

2. Culimada iyo Nabadoonada oo iyagoo mideysan ummadda ku hoggaamiya tubta toosan

3. Ganacsatada oo iyagoo mideysan bixiya canshuuraha haddii ay arkaan maamul wanaagsan

oo sugay ammaanka, soona jiitay kalsoonida shacabka.

Haddaba waxaa aad iyo aad muhiim u ah doorashada madaxtooyada iyo barlamaanka oo foota kusoo haya Galmudug, walow ilaa iminka uusan maamulka hadda jiraa uusan magac-caabin (Guddi Qabanqaabo doorashada) haddana waxaa durbaba bilowday guux weyn iyo shaqsiyaad isku soo sharaxay xilka madaxtooyada Galmudug State, taasoo ah rajo wanaagsan iyo bilow fiican.

Shacabka Galmudug waxay rajaynayaan in xilka madaxtooyada loo doorto shaqsi leh aqoon sare iyo khibrad dowladnimo kaasoo lagu soo xusho oo kaliyah in uu xilkaas uu gudan karo oo uu u qalmo( chosen on merit only). Soomaalidu waxay ku maahmaahdaa ” rag saddex ka ogow- gudoon jiclisan, gar-weecsan iyo gacan gudhan ama guran”.

Galmudug waxay u baahan tahay hoggaan ama hoggaamiye aragti dheer( visionary leader), daacad ah, diin iyo damiir fiyow leh oo shacabka u horseeda cadaalad, horumar iyo midnimo. Waxaa hubaal ah haddii madaxtooyada Galmudug uu kusoo baxo shaqsi u qalma oo soo jiita kalsoonada shacabka oo dhan in aqoonyahanka iyo waxgaradka qurba joogta ah oo reer Galmudug ay dhaqso ugu soo laaban doonaan dalka hooyo iyagoo diyaar u ah in ay ka qaybgalaan kaabidda iyo dib u dhiska dalka hooyo ee xagga ilaha waxbarashada, dhaqaalaha, maamulka dowladda, ammaanka iyo wixii lahalmaala.

Sida aanu ku hayno xogo jira, Galmudug waxay kamid tahay gobolada ugu hodansan dalka Somalia, hanoqoto bad,xoolo, macdan iyo muhiimadda halka ay kutaal intaba, balse waxay u baahan tahay dad ehel u noqda in ay iyagoo mideysan ay munaafacsadaan hodantinimadaas Alle.

Dad waxaa ragaadiya qurunka qabyaaladda, waxaana horumariya isku duubni, midnimo, xaqsoor ijtimaaci ah iyo ladagaalanka musuqmaasuqa.

By Hassan Shirwac

Somaliinfo kala soco warar dhex dhexaad ah had iyo jeer